Syril har ikkje for vane å uttale seg om politiske saker som føregår i kommunen, men no ser vi at behovet er der. Utbygginga på Saften er så viktig for heile Leikanger, og påverkar også idretten si rolle i kommunen. Vi har difor sendt følgjande innlegg til Sogn Avis:

Invester i ungdommen og lokalsamfunnet – det lønner seg

Utbygginga på Saften med kulturlokale, nytt bibliotek, frivilligheitssentral og oppgradert idrettshall, har vore ein del av økonomiplanen til Sogndal kommune i fleire år. No vurderer kommunen å gjere innsparingar ved å skrinlegge prosjektet. Som største frivillige organisasjon på Leikanger, meiner Idrettslaget Syril det er viktig å investere i ungdommen og lokalsamfunnet, og gjennomføre prosjektet.

Kvar einaste dag legg frivillige i idretten ned ein enorm innsats for å skape aktivitet og trivsel for barn og unge i heile Sogndal kommune. Leikanger og i Syril idrettslag inkludert. Dette er arbeid som gir verdiar langt utover idretten – det byggjer fellesskap, styrkar lokalsamfunnet og bidreg til å førebygge utfordringar som utanforskap og dårleg folkehelse. Både for vaksne og born. Resultatet av dette arbeidet ser vi ikkje att kun i idretten, men i heile lokalsamfunnet.

I Leikanger er nesten halvparten av innbyggarane medlem i idrettslaget, og om vi snakkar om aktive brukarar av anlegga vi har, så kan vi nesten doble dette talet. Vi ser kor viktig det er å ha møteplassar. Men, ikkje alle har tid, helse eller interesse av å møtast på idrettsbana, i skogen eller i skiløypa.

Når kommunen vurderer å kutte i tilbod som ungdomsklubb, bibliotek og kafé, ber vi dei om å løfte blikket og sjå på den langsiktige samfunnsøkonomiske verdien av slike tiltak. For kvar krone som blir brukt på førebyggande arbeid for ungdom, og for inkludering og trivsel i bygda, sparar vi mangedobla beløp seinare. Å kutte i slike tilbod betyr ikkje berre å spare pengar på kort sikt – det betyr også å betale prisen på lang sikt. Ved å investere i breidda og mangfaldet i tilboda til lokalsamfunnet i Leikanger, bidreg ein til å bygge grunnlaget for ei sterk og levedyktig bygd.

Heile Sogndal kommune vinn ved at det er triveleg å bu i alle delar av kommunen. Det kostar, men vi har ikkje råd til å la vera. Lytt til oss!

På vegne av Syril idrettslag,

Elianne Eggum (leiar)
Sindre Ramung (nestleiar)